Ich han Beef. Ich han Beef mit ere Tuube. Ich han Beef mit ere Tuube und zwar nid so uf die Art wo e Tuube au es Stückli vo mim Burger will, wenn ich Znacht iss. Nei. Ich han Beef mit ere Tuube uf die Art, wo ich zmitst in dr Nacht schweissbadet ufwach, will ich plötzlich s unguete Gfühl ha ihres Gurre ufem Balkon z ghöre. Ich han Beef mit ere Tuube uf die Art, wo ich täglich drizeh Mol s Fenster uffriss und sie luut aschrei, damit sie endlich abhaut. Uf die Art, wo ich mir nüt sehnlicher wünsch, als dass Tuube Zugvögel wäre und sich im Winter in Süde würde verpisse. Uf die Art, wo ich im Internet nach dr Lebenserwartig vo dene Viecher suech und mir e extremi Absenkig würd wünsche. Ich han Beef mit ere Tuube will sie mich nid in Rueh loh will. Will sie jede Tag uf mim Balkon sitzt, uf dem Balkon wo zu dere Wohnig ghört wo ich Mieti zahl, sie aber nid. Will sie ihri Kacke überall verteilt, nie ufruumt oder putzt, will sie mit ihrne Tuubekollege ihre Standort teilt. Und denn chömme immer mehr vo dene Tuube zu mir, ich schick sie weg aber die Tuube juckt das nid, sie chömme wiiter, egal was ich seg. Und dorum han ich Beef mit ere Tuube. Uf die Art wo ich ihre am liebste dr Hals würd umdreihe sodass sie nur no hässlicher chönnt chreie. Uf die Art wo ich sie Tag und Nacht in mim Chopf ha und das obwohl ich dört eigentlich kei Platz für so Rotz ha. Uf die Art, wo ich e Disstrack à la Kay One über sie schriib. Also:

Du bisch grau, genauso grau wie e chlini hässlichi Muus
Chillsch ständig uf mim Balkon, sodass ich mir denk: „Bro, Suech dir doch e eignigs Huus“
Dis einzige Talent isch s fliege und nid emol bi dem wirksch elegant

Du bisch dreckig, unhygienisch, gsehsch scheisse us, das isch bekannt

Ich schrei dich a, wünsch mir nüt sehnlicher als dis Verschwinde
Öpper zum liebe, zum glücklich si und Chinder ha wirsch du nie finde
Und trotzdem bisch tagtäglich do, sitzisch umme und kacksch uf d Muure
Würdsch plötzlich sterbe, dich s ziitliche segne, würd ich nid truure

Dis Gurre macht mich crazy
Weiss nümme was Iibildig isch und was echt
Du bisch eifach richtig lazy
uf mim Balkon chillsch du ohni Recht

und es isch jo nid so dass ich dich grundlos hass
es isch din Gstank, dis Gurre, dis gammelnde Wese
die Gfühl sind so stark es isch richtig krass
in dine Auge chan ich nur Dummheit und Leeri lese

du bisch e ganz normali Tuube us dr Stadt
dini Federe sind dreckig und wirke ganz matt
dis Gurre tönt wie e schlechts Justin Bieber Lied
und vo dim blöde Gehabe wird ich eifach nur mied

Ratte vo de Lüft werde Tuube mengisch gnennt
Doch das stimmt nid, das weiss jede wo Ratatouille kennt
Die Ratte hend Talent und sind ziemlich clever
Aber d Tuube, ganz ehrlich, die chönnte das never

mir werde nie Fründe, das chasch sofort vergesse
und mit andere Vögel chasch du dich nid messe
ich hoff eifach dass du irgendwenn gohsch
und mir mi Balkon wider überlohsch